Captura_de_pantalla_2018-11-07_a_las_10.52.52.jpg

“Astean milaka kilo egin arren, ez dugu artisau kutsurik galdu”

San Martin egunean, azaroaren 11n, ekiten zioten gure baserrietan txerriaren hilketari eta hor du, hain zuzen ere, bere jatorria. Gaur egun, ordea, urteko edozein sasoitan jaten dugu. Carlos Lecuberen lantegitik, esate baterako, 2.000 kilo inguru ateratzen dira astero. “Odolkiak ez du misteriorik”, esan digu, baina zerbait izango du Txarri Txikin egiten dutena, txapelketa ugari irabazi baditu

 
Nondik datorkizu ofizioa?
14 urterekin hasi nintzen harategi batean lanean, Getarian, txistorrak, odolkiak eta abar prestatzen, soldaduzkara joan arte. 20 urterekin nire kontura hasi nintzen lanean eta 38 urterekin, berriz, Aian, Txarri Txiki nire lantegi propioa jarri nuen martxan. Odolkoiak, txistorrak, saltxitxak, hanburgesak, tripakiak, eta abar egiten ditugu. Guztira 12 erreferentzia egiten ditugu, eta 11 langile ditugu. Gauzak ondo egitea izan da beti nire kezka nagusia eta horretan jartzen dut indarra.

Zenbat odolki egiten dituzue astean?
Astean 1.600-2.000 kilo odolki ekoizten ditugu. Demanda handia daukagu, garai honetan batez ere, nahiz eta urte osoan zehar ere egiten ditugun odolkiak.

Ze osagai behar dira odolkia egiteko?
Tipula eta porrua nahastu, mantekarekin ondo potxatu, eta gero urdaila gehitzen diogu. Beste batzuek manteka bakarrik erabiltzen dute, baina guri urdailarekin nahastea gustatzen zaigu, bestela ahoan pegatu egiten delako. Goierrin, adibidez, bakarrik manteka erabiltzen ditute. Ondoren, odola eta espeziak botatzen ditugu: kanela, oreganoa eta gatza. Gero tripan sartzen dugu, eta 20 minutuz egosi.

Etxean, ordea, berriro egosi behar da. Nola egin behar da lehertu ez dadin?
Lantegian 20 minutu besterik ez dugu egosten, lehortu ez dadin. Tenperatura ere garrantzitsua da: 90 gradu azpitik egin behar da, bestela eztia lehertu egiten baita. Gero, etxean, ondo egosi behar da, odola koagulatu arte. Lapikotik atera eta labana sartzean, odolki-zatia osorik gelditzen denean, ondo egosia dagoela esan nahi du. Odolkiak 8-10 egun aguantatzen ditu hozkailuan, baina lehen bait lehen jatea komeni da, hezetasuna galdu eta lehortzen hasten delako.

Egosteaz gainera, prestatzeko beste modurik dago?
Parrilan ere ondo egin daiteke, aluminiozko paperean bilduta. Eta ez eduki beldurrik mikro-ondasean egiteari! 3-4 minututan prest dago.

40 urte baino gehiago igaro dira odolkia egiten hasi zinenetik. Zertan aldatu da errezeta?
Egia da lehen urdaila gehiago botatzen zitzaiola, eta gainera pusketa handiagoak. Gaur egun urdailaren portzentajea dezente jaitsi dugu; lehen %40 inguru botatzen bagenion, orain %20.

Osasuntsua ez dela esaten dietenei, zer esango zenieke?
Produktuaren %70 barazkiak dira, beraz, oso osasuntsua da. Oso janerraza da eta gurea, batez ere, nahiko suabea.

Etxean gustuko duzue?
Noski! Odolki txapelketetara joan aurretik, probaketak egiten ditugu etxean. Semeak txikitatik horretan hezita daude, eta baita andrea ere. Haiek esaten didate zer falta edo sobratzen zaion.

Zertaz zaude harroen?
Jendeak esaten dizunean goxoa dagoela, gauzak ondo egiten ari zaren seinale. Astean milaka kilo egin arren, ez dugu artisau senarik galdu.